जेठ १५, सुर्खेत । सीता एअरले कर्णाली प्रदेशका विकट जिल्लाहरु जुम्ला, हुम्ला, मुगु र डोल्पामा प्रदेश राजधानी सुर्खेतबाट हवाइ सेवा शुरु गर्ने भएको छ ।
मुख्यमन्त्री महेन्द्रबहादुर शाहीसँग आज भएको छलफलमा सीता एअरले असार १५ देखि प्रदेश राजधानी सुर्खेतबाट हवाइ सेवा शुरु गर्ने प्रतिवद्धता गरेको हो ।
मुख्यमन्त्रीको कार्यालयमा भएको छलफलपछि उद्योग, पर्यटन, वन तथा वातावरण मन्त्रालयका उपसचिव वेसिन्दराज सुवेदी र सीता एअर प्रालिका वरिष्ठ महाप्रवन्धक घनश्याम आचार्यले हवाइसेवा संचालन सम्बन्धी प्रतिवद्धता पत्रमा हस्ताक्षर गर्नुभएको छ ।
प्रतिबद्धता पत्रमा कर्णाली प्रदेशमा पर्यटन र हवाइ यातायात सेवाको अभिबृद्धि गर्न प्रदेश राजधानीबाट जिल्ला सदरमुकामहरुमा रहेका विमानस्थलमा डोर्निएर २२८ को जहाजबाट उडान गर्ने उल्लेख गरिएको छ । सीता एअरले यसअघि नेपालगञ्जबाट हवाइ सेवा संचालन गरिरहेको थियो ।
प्रदेश राजधानी सुर्खेतबाट सिधै हवाइ यातायात संचालन भएपछि दुर्गम जिल्लाका नागरिकहरुलाई नेपालगञ्ज पुगेर सुर्खेत आउनुपर्ने समस्याबाट राहात मिल्ने मुख्यमन्त्री शाहीले बताउनु भयो ।
यसअघि कर्णाली प्रदेशका डोल्पा, जुम्ला, मुगु र हुम्ला जिल्लाका नागरिकहरुले हवाइ सेवाको प्रयोग गरी सुर्खेत आवागमन गर्दा नेपालगञ्जदेखि सुर्खेतसम्म ३ घण्टाको सडक यातायात प्रयोग गर्नुपर्ने अवस्था रहेको थियो ।
प्रदेश राजधानी सुर्खेतबाट सिधै यात्रा गर्दा भाडादर पनि सस्तो पर्ने सीता एअरका वरिष्ठ महाप्रवन्धक घनश्याम आचार्यले बताउनुभयो ।
