नुवाकोट, जेठ १४ ।
चिनियाँ प्राविधिक टोलीले रसुवागढी–काठमाडौं रेलमार्गको पूर्व सम्भाव्यता अध्ययन पूरा गरेको छ । गत जेठ ६ राजधानीको टोखाबाट अध्ययन सुरु गरेको टोलीले नुवाकोटको त्रिशुली हुदै रसुवाको रसुवागढी (टिमुरे)बाट केरुङसम्म अध्ययन पुरा गरेको हो ।
नेपाली सहितको चिनियाँ प्राविधिक टोलीले एक साताको अवधिमा रेलमार्गको पूर्व सम्भाव्यता अध्ययन पुरा गरेको रेल विभागका सिनियर डिभिजनल इञ्जिनियर प्रकाशभक्त उपाध्यायले जानकारी दिनुभयो ।
उहाका अनुसार विभागका महानिर्देशक अनन्त आचार्यको नेतृत्वमा रहेको टोलीले चीनबाट नेपालमा ल्याउने रेलमार्गको सम्भाव्यता अध्ययनका क्रममा काठमाडौंबाट नुवाकोटको त्रिशूली हुँदै केरुङसम्मको भौगर्भिक अध्ययन, भूगोलको बनावट, रेखाङ्कनको अवस्थासहितको सम्भाव्यता के हुन्छ भनेर अब प्रतिवेदन निर्माण गर्नेछ ।
आगामी असोज सम्म केरुङ–काठमाडौं रेलमार्गको प्रारम्भिक अध्ययन प्रतिवेदन चिनियाँ पक्षले बुझाउने तयारी भएकाले अहिलेको पूर्वसम्भाव्यता अध्ययनलाई महत्वका साथ लिइएको छ ।
सरकारले गत सोमबार सार्वजनिक गरेको आगामी आर्थिक वर्षको नीति तथा कार्यक्रममा रसुवागढी–काठमाडौं–पोखरा–लुम्बिनी रेलमार्ग निर्माण गर्ने विषय समावेश गरेकाले चिनियाँ रेल भित्रने संकेतका आधार बलियो बनेको छ ।
