काठमाडौ, १ जेठ ।
लामो समयदेखि अलपत्र रहेको भूकम्पबाट क्षतिग्रस्त काठमाडौको धरहरा पुनर्निर्माण राष्ट्रिय पुनर्निर्माण प्राधिकरणले नै गर्ने भएको छ ।
धरहरा पुनर्निर्माणको शिलान्यास असारमै गर्नेगरी तयारी गर्दै पुनर्निर्माणका लागि टेण्डर आह्वान समेत भइसकेको प्राधिकरणले जनाएको छ ।
धरहरा पुन पुनर्निर्माणका लागि झन्डै चार अर्ब रुपैयाँ लाग्ने लागत अनुमान गरिएको प्राधिकरणका सहसचिव राजुमान मानन्धरले जानकारी दिनुभयो ।
शिलान्यास भएको दुई वर्षमा धरहरा पुनर्निर्माण भइसक्ने प्राधिकरणको लक्ष्य छ । यसअघि सरकारले ‘हाम्रो धरहरा हामी आफैँ बनाउँछौँ’ अभियान सुरु गरेको थियो । अभियान अन्तर्गतबाट २४ करोड रुपैयाँ संकलन भएको जनाएको छ ।
धरहराको पुनर्निर्माण नेपाल टेलिकमले गर्ने प्रतिबद्धता जनाए पनि करिब अढाइ वर्षपछि निर्णय फिर्ता लिएको थियो ।
यद्यपी पुनर्निर्माणका लागि भने टेलिकमले एक अर्ब रुपैयाँ सहयोग गर्ने प्रतिबद्धता जनाएको छ । प्राधिकरणका अनुसार बाँकी अपुग रकम सरकारले व्यहोर्नेछ ।
