काठमाडौं, बैशाख २४ ।
सरकारको निर्देशनमा नेपाल राष्ट्र बैंकले अवैध रुपमा सञ्चालित २ सय ४५ वटा यातायात समितिका बैंक खाता रोक्का गरेको छ ।
अर्थ मन्त्रालय, वित्तीय क्षेत्र व्यवस्थापन महाशाखाको पत्रअनुसार तोकिएका समितिहरुको खाता रोक्का गर्न निर्देशन आएको राष्ट्र बैंकद्वारा बैंक तथा वित्तीय संस्थालाई पठाएको पत्रमा उल्लेख छ ।
सरकारले यातायात समितिहरुको सम्पत्ति छानबिन गर्ने घोषणा गरेलगत्तै नेपाल राष्ट्र बैंकले ती समितिहरुको बैंक खाता रोक्का गरेको जनाउदै राष्ट्र बैंकका प्रवक्ता नारायणप्रसाद पौडेलले अब सरकारकै निर्देशन नआएसम्म ती खाता फुकुवा नहुने बताउनु भयो ।
राष्ट्र बैंकले सरकारी निर्देशनअनुसार सातवटै प्रदेशका समितिका खाता रोक्का भएका हुन् ।
जसमा प्रदेश १ मा ३५ वटा, २ मा १० वटा, ३ मा १ सय १८ वटा, ४ मा २४ वटा, ५ मा ४० वटा, कर्णालीमा १२ वटा र प्रदेश ७ मा ९ वटा यातायात समिति परेका छन् ।
सरकारले पठाएको पत्रको आशयका आधारमा यो संख्या अझै बढ्न सक्ने राष्ट्र बैंकले जनाएको छ । यी खातामा कति रकम छ भन्नेबारे जानकारी गराईएको छैन ।
