दार्चुला, २४ माघ ।
आगामि माघ २७ गतेबाट राष्ट्रिय गौरवको आयोजना चमेलिया जलविद्युतले व्यावसायीक उत्पादन सुरु गर्ने भएको छ ।
आयोजनास्थल दार्चुलाको बलाचिमा माघ २७ गते प्रधानमन्त्री शेरबहादुर देउवाले औपचारिक उद्घाटन गर्ने र सोहिदिनमा उत्पादन सुरु गरिने आयोजना प्रमुख अजय दाहालले जानकारी दिनुभयो ।
सरकारी लगानीमा निर्माण भएको ३० मेगावाटको चमेलिया जलविद्युत्को उद्घाटनका लागि आयोजना स्थलमा आवश्यक तयारी थालिएको समेत उहाँले जानकारी दिनुभयो ।
आयोजनाले हाल १५÷१५ मेगावाटका दुई युनिटबाट विद्युत् उत्पादन गरी राष्ट्रिय प्रसारण लाइनमा जोडेको छ ।
आयोजना निर्माण शुरु भएको झण्डै ११ वर्षपछि विद्युत् उत्पादन भएको हो । आयोजना निर्माण सम्पन्न गर्ने निर्धा्रित लक्ष्यभन्दा ६ वर्ष बढी समय लागेको हो । आयोजना निर्माणमा भएको ढिलाइले लागत बढेर १६ अर्ब रुपैयाँमा पुगेको छ ।
आयोजनाले वार्षिक १८ करोड ४२ लाख युनिट बिजुली उत्पादन गर्ने जनाइएको छ । आयोजनाका अनुसार यसबाट वार्षिक रु एक अर्ब १० करोड आम्दानी हुनेछ । आयोजना चाइना गेजुवा ग्रुप अफ कम्पनी (सीजीजीसी) ले निर्माण गरेको हो ।
