क्वालालम्पुर , पुस १५ ।
यसवर्ष गैर कानूनी रुपमा मलेसियामा बस्दै आएका करीब १६ हजार नेपाली कामदार स्वदेश फर्किएका छन् ।
वैदेशिक रोजगारीका क्रममा मलेसिया पुगेपनि विभिन्न कारणले गैरकानूनी हैसियतमा रहेका १५ हजार ८ सय ५५ नेपाली कामदार स्वदेश फर्किएको मलेसियास्थित नेपाली दूतावासले जनाएको छ ।
दूतावासको तथ्यांकअनुसार यसवर्ष सो संख्यामा एकतर्फी अस्थायी यात्रा अनुमतिपत्र जारी भएको हो । गैरकानूनी हैसियतका नेपाली स्वदेश फिर्न नेपाली दूतावासबाट यात्रा अनुमतिपत्र लिनुपर्ने प्रावधान छ ।
त्यस्तो पत्रका लागि कामदारले १ सय ६० रिंगिट शुल्क तिर्नुपर्ने प्रावधान छ । ती बाहेक आफूसँग भिसा नभएको तर राहदानी भएकाहरुले भने यात्रा अनुमतिपत्र लिनुपर्दैन ।
उनीहरुले सोही राहदानीमा आफैं मलेसियाली अध्यागमन कार्यालयमा पुगेर जरिवाना र आउटपासका लागि अतिरिक्त शुल्क तिरेपछि हवाई टिकट व्यवस्था मिलाई नेपाल फर्कन सक्छन् ।
