काठमाडौँ, २९ मंसिर ।
रक्षामन्त्री भीमसेनदास प्रधानले तीनै तहको निर्वाचन सम्पन्न भईसकेकाले अब सुशासन कायम गरी मुलुकलाई आर्थिक विकासको गतिमा अघि बढाउनुपर्नेमा जोड दिनुभयो ।
शहीद शुक्रराज शास्त्रीको १२४औँ जन्मजयन्तीका अवसरमा आज काठमाण्डौमा आयोजित कार्यक्रममा उहाँले निर्वाचनमा काँग्रेसले हारेर पनि देशले जितेको धारणा राख्नुभयो ।
संविधान कार्यान्वयनका लागि भएको प्रतिनिधिसभा तथा प्रदेशसभाको निर्वाचनसँगै शहीदका सपना पनि पूरा हुँदै गएको उहाँको भनाई छ । “जनताको हक, अधिकार र मुलुकको विकासका लागि शहीदहरुले सहादत प्राप्त गरेका थिए अब त्यो सपनालाई हामीले पूरा गर्नुपर्छ,” मन्त्री प्रधानले भन्नुभयो ।
मन्त्री प्रधानले राणा शासन बिरुद्ध लड्दै गर्दा सहादत प्राप्त गर्नुभएका चार शहीदमध्ये तीन शहीदको नाममा विभिन्न पूर्वाधार स्थापना भए पनि धर्मभक्तको नाममा केही नबनेकाले उहाँलाई सम्झने गरी अस्पताल निर्माण गर्नुपर्ने धारणा व्यक्तगर्नुभयो ।
पूर्वसभामुख दमननाथ ढुङ्गानाले शहीदले मुलुकको विकास र समृद्धिका लागि देखेको सपना पूरा भए मात्र उहाँहरुप्रति सच्चा श्रद्धाञ्जलि हुने बताउनुभयो । उहाँले नयाँ सरकारले शिक्षाको विकासका लागि छुटृै नीति तथा कार्यक्रम ल्याउनुपर्ने सुझावसमेत दिनुभयो ।
