काठमाडौ ६ मंसिर ।
जिम्बाबेका राष्ट्रपति रोबर्ट मुगाबेको राजिनापछि त्यहाँ करिब डेढ सातादेखि जारी राजनीतिक गतिरोध अन्त्य भई निकास निस्किने अनुमान गरिएको छ ।
राष्ट्रपतिको राजिनामापछि खुसियाली मनाउदै लाखौं नागरिक सडकमा उत्रिएका छन् । ३७ वर्ष शासन गरेका राष्ट्रपति मुगाबेले चौतर्र्फी दवावपछि पदबाट राजिनामा दिनुभएको हो ।
पत्नी ग्रेस मुगावेलाई उत्तराधिकारी बनाउन खोज्दा उत्पन्न भएको विवादकाबीच सत्तारुढ दलले पनि महाअभियोग लगाउने तयारी गरेपछि राष्ट्रपति मुगाबे राजिनामा दिन बाध्य हुनु भएको हो ।
मुगाबेले राजीनामाको कारणमा ‘जिम्बावे जनताको भलाइ’ तथा ‘शान्तिपूर्ण शक्ति हस्तान्तरण’ उल्लेख गर्नुभएको सरकारी अधिकारीलाई उधृत गर्दै अन्तर्राष्ट्रिय सन्चार माध्यमले जनाएका छन् ।
सेनाले शक्ति आफ्नो हातमा लिइ ९३ वर्षीय मुगाबेलाई घरमै नजरबन्दमा राखेपछि सत्तारुढ दल जानु पीएफले पनि मुगाबेलाई दलको नेताबाट बर्खास्त गरेको घोषणा गरेको थियो ।
सो पार्टीले पूर्व उपराष्ट्रपति इमर्सन नान्गाग्वालाई पार्टीको नेतामा नियुक्त गर्नुका साथै मुगाबेकी पत्नी ग्रेसलाई समेत पार्टीबाट निष्कासन गरेको जनाएको छ ।
