काठमाडौं ३ मंसिर । चीनले केरुङ हुँदै काठमाडौं र लुम्बिनीसम्म रेल लाइन विस्तारबारे अध्ययन गरिरहेको समयमा भारतले पनि जयनगरबाट प्रदेश नम्बर २ को जनकपुर हुँदै बर्दिबाससम्म रेल सेवा विस्तार गर्ने योजनालाई अघि बढाएको छ ।
भारतको बिहार राज्यमा पर्ने जयनगरबाट नेपालको जनकपुर हुँदै कुर्थासम्म ३५ किलोमिटर रेलवे लाइन पहिलो चरणमा निर्माण भइरहेको छ । यो रुटमा सन् २०१८ अक्टोबरसम्म रेल सेवा सञ्चालन गर्ने लक्ष्य छ । बर्दिबाससम्म ६९ किलोमिटर रेलवे लाइन निर्माण सन् २०२१ मा पुरा गर्ने योजनाका साथ काम भइरहेको जनाइएको छ ।
इरकोन नामक निर्माण कम्पनीले यो रेलवे लाइन निर्माणको जिम्मा पाएको छ । सो कम्पनीका अनुसार सन् २०१९ सम्म कुर्थाबाट बिजलपुरासम्म रेल ट्र्याक निर्माण सम्पन्न भइसक्ने छ । सोही वर्षको मार्चदेखि जयनगर–बिजलपुरासम्म रेल सेवा सञ्चालन गरिनेछ ।
बिजलपुरादेखि बर्दिबाससम्मको रेलवे लाइन भने सन् २०२१ सम्म पुरा हुने जनाइएको छ ।
जयनगरमा नेपाल जाने रेलका लागि अलग स्टेशन बनाइएको छ ।
