१७ कात्तिक,काठमाडौँ । ८८ किलो सुन काण्डमा संलग्न भएको आरोप लागेका ४ चिनियाँसहित १० जना विरुद्ध ४३ करोड बढी बिगो मागदाबी गर्दै प्रहरीले काठमाडौं जिल्ला अदालतमा आज मुद्दा दायर गरेको छ ।
उनीहरुलाई संगठित अपराध ऐनअनुसार ४३ करोड ५६ हजार रुपैयाँ बिगो मागदाबी गर्दै मुद्दा दायर गरिएको अपराध महाशाखाका प्रमुख एसएसपी दिवेश लोहनीले जानकारी दिनुभयो । बरामद भएको ८८ किलो सुनको मूल्यलाई बिगो बनाइएको प्रहरीले जनाएको छ । प्रहरीले गणेशदत्त बडु, सत्यनारायण अग्रवाल, शुभरत्न शाक्य, नन्दकुमार पाण्डुरत्न मर्गले, उल्लाहास दिनकर सालुखे र ल्याक्पा ग्याल्जोङ तथा ३ चिनियाँ नागरिकविरुद्ध मुद्दा दायर गरेको हो ।
गत भदौ १९ गते केरुङ नाका हुँदै अवैध रुपमा काठमाडौं ल्याइएको ८८ किलो सुन प्रहरीको अपराध महाशाखाको टोलीले क्षेत्रपाटीबाट नियन्त्रणमा लिएको थियो । सुनसहित पक्राउ परेका गाडी चालकको बयानका आधारमा प्रहरीले व्यवसायी लगायत तस्करीमा संलग्नलाई पक्राउ गरेको थियो । सो सुन तस्करीमा संलग्न रहेका भनिएका अन्य ४ जना भने फरार रहेको प्रहरीले जनाएका छन् ।
