एजेन्सी कात्तिक ११।
स्पेनका प्रधानमन्त्री मारियानो राखोयले क्याटेलोनियाको संसद भंग गरेर प्रत्यक्ष शासन लागू गर्नु भएको छ । प्रधानमन्त्री राखोयले क्याटेलोनियाका नेता कार्लोस पुजिमोन्ट, उहाँको मन्त्रिपरिषद र प्रहरी प्रमुखलाई बर्खास्त गर्नु भएको छ ।
उहाँले क्याटेलोनियामा चुनाव गराउने घोषणा पनि गरेको बीबीसीले उल्लेख गरेको छ । अब क्याटेलोनियामा आगामी डिसेम्बर २१ मा चुनाव हुने भएको छ । स्पेनका प्रधानमन्त्री राखोयले यो चुनाव स्वतन्त्र र निष्पक्ष हुने प्रतिवद्धता जनाएका भएको छ ।
स्पेनबाट स्वतन्त्र हुनका लागि भन्दै अक्टोबर १ तारिखमा क्याटलोनियामा जनमत संग्रह गराइएको थियो जसलाई स्पेनको संवैधानिक अदालतले अवैध ठहर गरेको थियो । स्पेनबाट अलग हुने कि नहुने भनेर गराइएको जनमत संग्रहमा अलग हुने पक्षमा बहुमत आएको थियो ।
तर, क्याटेलोनियाका नेता पुजिमोन्टले भने अलग भएको घोषणा गरिसकेका थिएनन् । क्याटेलोनियाको क्षेत्रीय संसदले हिजो स्पेनबाट स्वतन्त्र हुने घोषणा गरेको थियो । १३५ सदस्यीय सदनमा प्रस्तावको पक्षमा ७० र विपक्षमा १० भोट आएको थियो ।
केही सदस्यहरुले भने मतदान बहिस्कार गरेका थिए । यस मतदानपछि क्याटेलोनियाले स्पेनको संविधान खारेज गरेको थियो ।
