बुटवल , ८ कार्तिक ।
स्वदेशी वस्तुको उत्पादन र बजार प्रवद्धन गर्ने उदेश्यले आजदेखि बुटवलमा राष्ट्रिय औद्योगिक प्रदर्शनी कृषि ब्यापार तथा पर्यटन प्रवद्र्धन महोत्सव सुरु हुँदैछ ।
राष्ट्रिय स्वाधिनताको लागि राष्ट्रिय अर्थतन्त्र, राष्ट्रिय अर्थतन्त्रको लागि राष्ट्रिय औद्योगिकरण तथा ब्यापार विविधिकरण भन्ने नारा सहितको प्रद्धर्शनी रुपन्देही उद्योग व्यापार संगठनले आयोजना गरेको हो ।
बुटवल मण्डपमा आयोजित प्रद्धर्शनीको सबै तयारी सकिएको संयोजक खेम श्रीसले बताउनुभयो । बुटवल मण्डपमा आयोजित मेलाको पूर्व प्रधानमन्त्री पुष्पकमल दाहाल प्रचण्डले उद्घाटन गर्नुहुनेछ । कृषि, पर्यटन र स्थानीय उत्पादनलाई प्राथमिकताका साथ राखीने छ ।
कृषि, पर्यटन, सुचना ,घरेलु उत्पादन, खाद्यान्न, गार्मेट औद्योगिक उत्पादन, अटो व्यवसाय, वैकल्पिक उर्जा लगायतका छुट्टाछुट्टै स्टल बनाइएको छ । ११ दिनसम्म चल्ने प्रदर्शनीमा औधोगिक उत्पादनका स्वदेशी तथा विदेशी वस्तुहरुको प्रदर्शनी र बिक्री दुवै गरिनेछ ।
दैनिक उपभोग्यबस्तु, साना तथा घरेलु उत्पादन, जडिबुटी तथा कृषि उत्पादन, औधोगिक मेसिनरी तथा उपकरण, हस्तकलाका उत्पादन, अटोमोवाइल्स, सूचना प्रविधि तथा इलोक्ट्रनिक्स लगायतका ३ सय ५० वटा स्टलहरु सहभागी रहेका छन् ।
