एजेन्सी २४ भदौ ।
मेक्सिकोको दक्षिणी तटीय क्षेत्र केन्द्रविन्दु भएर गएको ८ दशमलव १ म्याग्नेच्युटको शक्तिशाली भूकम्पमा परी मृत्यु हुनेको संख्या ५८ पुगेको छ ।
भूकम्पका कारण कम्तिमा दुई सय जना घाइते भएको अन्तर्राष्ट्रिय सन्चार माध्यमले जनाएका छन् । भूकम्पका कारण ताबास्को, ओआखाका र चियापास राज्यमा बढी प्रभाव परेको छ ।
उक्त राज्यमा उद्धार तथा राहतको काम तीब्र रुपमा भइरहेको सरकारी अधिकारीलाई उधृत गर्दै बिबीसीले उल्लेख गरेको छ । भूकम्पका कारण ओआदाकाको हुचितान शहर बढी प्रभावित भएको छ ।
भूकम्पले भत्किएका भवनमा मानिस फसेको हुन सक्ने आशंकामा खोजी तथा उद्धार कार्य जारी राखिएको छ । यो भूकम्प मेक्सिकोमा शताब्दीकै ठूलो भूकम्प भएको बताइएको छ ।
भूकम्पका कारण ओआखाकामा सबै भन्दा बढी ४५ जनाको मृत्यु भएको राष्ट्रिय आपतकालिन कमिटीले जनाएको छ । यस्तै चियापासमा १० तथा ताबास्कोमा तीन जनाको शव भेटिएको छ ।
