एजेन्सी, भाद्र २३ ।
दक्षिण अमेरिकी मुलुक मेक्सिकोमा ८ म्याग्निच्युट भन्दा बढीको शक्तिशाली भूकम्प गएको छ । प्रशान्त महासागरको तटीय क्षेत्रलाई केन्द्र बनाएर गएको भूकम्पको कम्पन सयौं किलोमिटर टाढासम्म महसुश गरिएको अन्तर्रा्ष्ट्रिय सञ्चारमाध्यमले जनाएका छन् ।
शुरुमा भुकम्पको तीब्रता ८ भनिएपनि पछि ८ दशमलव १ म्याग्निच्युट रहेको बताइएको छ । भुकम्पपछि मेक्सिको सहित छिमेकी मुलुक ग्वाटेमाला, एल सल्भाडोर, कोस्टारिका, निकारागुआ, पनामा र होन्डुरसमा सुनामीको चेतावनी जारी गरिएको छ ।
ठुलो भुकम्पपछि ५ दशमलव ७ म्याग्निच्युट सम्मका ४ वटा परकम्प गएको त्यहाको भुकम्प मापन केन्द्रले जनाएको छ । मेक्सिकोका केही स्थानमा विद्युत सेवा समेत कटौती भएको छ । स्थानिय प्रशासनले सावधान र सुरक्षित रहन आम जनतालाई आग्रह गरेको छ ।
झण्डै एक मिनेटसम्म भूकम्पले हल्लाएको र मानिसहरु भागदौड गर्दै सडकमा निस्किएको मेक्सिको सिटीका प्रत्यक्षदर्शीलाई उद्धृत गर्दै बीबीसीले जनाएको छ । भुकम्पले पुर्याएको क्षतिको विवरण भने प्राप्त भइ नसकेको बताइएको छ ।
