एजेन्सी , ९ भदौ ।
भ्रष्टाचारको मुद्दा खेपिरहेकी थाईल्याण्डकी पूर्व प्रधानमन्त्री यीन्लक सिनावात्रा भागेर तेश्रो मुलुक पुगेकी छन् ।
अदालतमा आज भ्रष्टाचारसम्बन्धी मुद्दाको सुनुवाई शुरु हुनु अघि नै उनी भागेर तेश्रो मुलुक पुगेको श्रोतलाई उदृत गर्दै बीबीसीले उल्लेख गरेको छ । उनी गएको मुलुकको नाम भने खुलेको छैन ।
बिरामी भएको भन्दै अदालतमा उपस्थित नभएपछि सिनावात्राविरुद्ध अदालतले पक्राउ आदेश जारी गरेको छ । सो मुद्दामाथिको आगामी सुनुवाई आगामी सेप्टेम्बर २७ लाई सारिएको छ ।
चामलमा दिईने सरकारी सहायता कार्यक्रममा लापरवाही गरी ठूलो रकम हिनामिना गरेको आरोप सिनावात्रामाथि लगाइएको छ । थाई सरकारलाई सो सहायता कार्यक्रमबाट अर्वौ डलर घाटा पुगेको थियो ।
सन् २०११ मा पहिलो महिला प्रधानमन्त्री बनेकी सिनावात्रा सन् २०१५ मा महाअभियोग लागेपछि पदमुक्त भएकी थिईन् ।
पूर्व प्रधानमन्त्री थाक्सिन सिनावात्राकी बहिनी यीन्लक सिनावात्राले आफुमाथि राजनितिक षड्यन्त्रका कारण भ्रष्टाचार मुद्धा लगाईएको आरोप लगाउँदै आएकी छन् ।
