२७ साउन, काठमाडौं ।
सरकार र राष्ट्रिय जनता पार्टी राजपा संसदमा विचाराधीन अवस्थामा रहेको संविधान संशोधन विधेयकलाई तत्काल निर्णयार्थ पेश गर्न सहमत भएका छन् । यससँगै राजपा आगामी असोज २ गते हुने प्रदेश २ मा हुने स्थानीय तहको चुनावमा सहभागी हुने छ ।
सत्तारुढ नेपाली कांग्रेस, नेकपा माओवादी केन्द्र र राजपाका शीर्ष नेताहरुबीच आज बिहान बालुवाटारमा भएको छलफलमा संविधान संशोधन विधेयक अघि बढाउने सहमति भएको हो ।
सम्भवत आगामी मंगलबार संशोधन विधेयकमाथि संसदमा मतदान हुनेछ । बैठक पछि बोल्दै राजपाका नेता शरतसिंह भण्डारीले संशोधनलाई तत्काल अघि बढाउने र पारित गर्ने सहमति भएको जानकारी गराउनु भयो । साथै उहाँले संशोधन विधेयक पास हुनेमा आफूहरु विश्वसत रहेको पनि बताउनु भयो ।
संशोधन अघि बढाउने सहमति भएपनि विधेयकको पक्षमा दुई तिहाई बहुमत अझै देखिएको छैन । सत्तारुढ दलका नेताहरुका अनुसार संशोधन विधेयक पास गर्न प्रयास गर्ने तर, पास फेल जे भएपनि परीणामलाई स्वीकार गर्दै राजपा निर्वाचनमा जाने सहमति भएको छ ।
