काठमाण्डौं साउन १८ । कतारमा साउदी अरबले लगाएको नाकाबन्दीको असर नेपाली सहित विदेशी कामदारमाथि पर्न थालेको छ ।
अहिले कतारमा रहेका विदेशी कम्पनीहरुमा काम गर्ने धेरै नेपाली कामदारलाई कम्पनीले काम दिन छाडेको छ । उनीहरु काम नभए पछि घर फर्कन समेत आर्थिक अभावले समस्यामा परेको बताईएको छ ।
कम्पनीले एक महिना सम्म कोठामा कोचेर राख्ने र हवाई टिकटको व्यवस्था समेत गर्न ढिलो गरीरहेका छन् । कम्पनीमा कच्चा पदार्थको आयात र निर्यात व्यापारमा समस्या भए पछि रोजगारीमा गएका युवाको बिचल्ली भएको हो ।
अहिले धमाधम युवाहरु स्वदेश फर्कन थालेका छन् । कतारमा रहेका एक नेपाली युवाले कतारमाथि नाकाबन्दी लगाएको १० दिन पछि देखि साग सब्जी खान नपाएको समेत बताए । अहिले युवाहरु खाली दालभातको भरमा बाचीरहेका छन् । सानो मुलुक कतारमा साउदी अरबले लगाएको नाकाबन्दी पछि सामान आयात निर्यातमा ठूलो समस्या परेको छ । ठूलो संख्यामा नेपाली कामदारहरु कतारमा रहेका छन् ।
