एजेन्सी, चैत्र १७ ।
नेपाली समाजमा भिक्षु जीवन निर्वाह गर्न भनेर आफ्नो घर परिवार छाडेर गएको घटना सामान्य भइसकेको छ । तर एक अवतारी धर्मगुरुले विवाह गर्नकै लागि भनी भिक्षु जीवन त्याग गरेका छन् ।
सानैदेखि आफूलाई कर्मा काग्यु सम्प्रदायको कर्मापा लामाको अवतारी दाबी गर्दै आएका थाए दोर्जेले ३३ वर्षको उमेरमा भिक्षु जीवन त्याग गरेर विवाह गरेको घोषणा गरेका छन् ।
बुधबार १७ औँ ग्याल्वा कर्मापा थाए दोर्जेको कार्यालयले वेबसाइटमार्फत निजी समारोहबीच उनको विवाह सम्पन्न गरेको घोषणा गरेको हो । उनले भुटानमा जन्मेर भारत र युरोपमा बस्दै आएकी ३६ वर्षीया रिञ्छेन याञ्जोनसँग गत मार्च २५ का दिन विवाह गरेको जनाइएको छ ।
‘विवाह गर्ने मेरो निर्णयले ममाथी मात्रै होइन पूरै वंशका लागि नै सकारात्मक प्रभाव पार्नेछ,’ दोर्जेले भनेका छन्, ‘यसबाट हामी सबैका लागि केही सुन्दर, केही लाभदायी कुरा प्रकट हुनेछ ।’
थाए दोर्जे तिब्बतमा जन्मिएका हुन् । उनले डेढ वर्षको उमेरदेखि नै आफू कर्मापा लामा भएको बताउँदै आएको जनाइएको छ । सन् १९९४ मा उनी परिवारसहित नेपाल हुँदै भारत पुगेका थिए ।
यद्यपि, आफूलाई कर्मा काग्युको शीर्ष अवतारी लामा दाबी गर्ने उनी एक्ला व्यक्ति भने होइनन् । उर्गेन ट्रिन्ले नामक अर्का लामाले पनि आफू अवतारी लामा भएको बताउँदै आएका छन् ।
