काठमाडौँ, २८ माघ । नक्सालमा जगदम्बा हस्पिटालिटीले निर्माण थालनी गरेको ‘ट्री हिल्टन होटल’को जग खन्ने क्रममा स्थानीयलाई परेको प्रभावका विषयमा आज संसदमै छलफल भएको छ ।
नक्साल भगवती मन्दिर नजिक होटल निर्माणको क्रममा जग खन्दा बाटो भासिए पछि स्थानीय पीडित बनेका छन् । सवारी साधन बाटोमा चल्न नपाए पछि त्यस भित्र पर्ने सर्वसाधारण र विभिन्न कार्यलय स्थापना गरेका कार्यलयका कामहरु प्रभावित भएका छन् । संसद्को शुशासन तथा अनुगमन समितिमा जग खन्ने क्रममा पहिले सडक भासियो, अहिले स्थानीयका घर चर्किन थालेको छ ।
जमिन सतह गहिरो बनाउनु नियति हो कि भवितव्य, आफूलाई चाहिने जग्गा सहजै प्राप्त गर्न नसकेपछि, होटलले जानीजानी खाडल गहिरो बनाएको आरोप स्थानीयले लगाएका छन् । प्राविधिक र अनुगमनको जिम्मेवारी पाएका निकायले उत्तर दिनुप¥यो, बैठकमा सांसद्को माग थियो ।
माग गर्ने संसदहरुमा उदय नेपाली श्रेष्ठ, अकबर शाह, जनकराज जोशी, मिलन राजवंशी लगायत हुनुहुन्थ्यो । बैठकमा सहरी विकास मन्त्रालयका सचिव दीपेन्द्रनाथ शर्माले यसप्रकारको घटना पहिलो नभएको जनाउँदै भवन ऐन संशोधन आफ्नो प्राथमिकतामा रहेको बताउनुभयो ।
बैठकमा उपत्यका विकास प्राधिकरणका आयुक्त डा भाइकाजी तिवारीले होटललाई वेसमेन्टमा दुई तलाको प्रारम्भिक स्वीकृति दिएको बताउनु भयो । काठमाडौँ महानगरका प्रमुख तथा कार्यकारी अधिकृत रुद्रसिंह तामाङले होटलले भवन निर्माण अनुमति लिन अन्य निकायको सिफारिसमा दिएको निवेदनका विषयमा सार्वजनिक सूचना प्रकाशित गर्दा गुनासो नआएको, मुचुल्का उठाउँदा संधीयारबाट हुन्न नभनेकाले स्वीकृति दिएको जनाउँदै, स्थानीय मर्का व्यवस्थापन गर्न आफू तत्पर रहेको बताउनु भयो । उठेका सवालमाथि जवाफ दिने क्रममा सडक विभागका उपनिर्देशक रवीन्द्रनाथ श्रेष्ठले डिजाइन त्रुटिकै कारण समस्या आएको बताउनु भएको थियो ।
