काठमाण्डौ, १ भदौ ।
बंगलादेशका सुरक्षा अधिकारीको टोलीले आज प्रधानमन्त्री पुष्पकमल दाहालसँग भेटवार्ता गरेको छ ।
प्रधानमन्त्री कार्यालय सिंहदरबारमा भएको भेटमा प्रधानमन्त्री दाहाल र बंगलादेशी टोलीबीच समसामयीक अवस्था , भुकम्पपछिको पुननिर्माण र त्यसको अवस्थाका बिषयमा छलफल भएको थियो ।
भेटका क्रममा प्रधानमन्त्री दाहालले भूकम्पपछिको उद्धार र राहतमा बंगलादेशका सुरक्षाअधिकारीले गरेको सहयोगप्रति आभार प्रकट गर्नुभएको थियो ।
नेपाल र बंगलादेश दुवैले प्राकृतिक बिपत्तिको सामना गर्नु परिरहेको उल्लेख गर्दै उहाले उद्धार, राहत र पुननिर्माणमा एक–अर्काका अनुभव आदान–प्रदान गर्न नेपाल सरकार इच्छुक रहेको पनि बताउनु भयो ।
जवाफमा बंगलादेशका सुरक्षा अधिकारीले दुई देशको सम्बन्ध र बिपत्तिको सामनामा बंगलादेशको सुरक्षा संयन्त्र मिलेर काम गर्न इच्छुक रहेको धारणा राखेको प्रधानमन्त्रीको निजी सचिवालयले जनाएको छ । टोलीले नेपालले सक्षम र प्रतिभाशाली प्रधानमन्त्री पाएको चर्चा समेत गरेको थियो ।
