काठमाडौ ३२ साउन ।
यमनको उत्तरी हज्जाह प्रान्तमा एक परोपकारी संस्थाले सञ्चालन गरेको अस्पतालमा हवाई आक्रमण हुँदा कम्तीमा ११ जनाको मृत्यु भएको छ ।
परोपकारी संस्था मेडिसिन सान्स फ्रोन्टियर्स एमएसएफले सञ्चालन गरेको अस्पतालमा आक्रमण भएको अन्तर्राष्ट्रिय सन्चार माध्यमले जनाएका छन् ।
आक्रमणमा अन्य १९ जना घाइते भएको एमएसएफलाई उद्धृत गर्दै बिबिसीले जनाएको छ । साउदी अरेबियाको नेतृत्वको गठबन्ध सेनाले हवाई आक्रमण गरेको अनुमान गरिएपनि यसबारेमा स्वतन्त्र पुष्टी हुन भने बाँकी रहेको जनाएको छ ।
गठबन्धन सेनाले हुथी बिद्रोही विरुद्धको कारबाहीमा यमनको सरकारलाई सहयोग गर्दै आएको छ । गठबन्धनले यस विषयमा अहिलेसम्म केही बताएको छैन ।
त्यस क्षेत्रमा पुनः आक्रमण हुन सक्ने डरका कारण उद्धार तथा राहतको काम पनि प्रभावित भएको छ । आक्रमणमा ज्यान जानेमा एमएसएफका कर्मचारी तथा अस्पतालमा उपचाररत बिरामी छन् ।
