काभ्रे, ३० साउन । काभ्रेको बिर्तादेउराली–९, खहरेमा बस दुर्घटना हुँदा ३२ जनाको मृत्यु भएको छ । दुर्घटनामा तीस जना भन्दा बढी यात्रु घाइते भएका छन् ।
काभ्रेबाट रामेछापका लागि छुटेको बा ३ ख १०६ नम्बरको यात्रुबाहक बस बिर्तादेउराली–९ खहरेमा आज दिउँसो दुर्घटनाग्रस्त हुँदा मृत्यु हुनेको संख्या ३१ पुगेको डिएपी नवीन राईले जानकारी दिनु भयो ।
उहाँका अनुसार २५ जनाको घटनास्थलमै मृत्यु भएको हो । बाँकीको उपचारका लागि लैजाने क्रममा तथा अस्पतालमा मृत्यु भएको हो । मृतकको अझै सनाखत हुन सकेको छैन । मृतकको संख्या अझै बढ्न सक्ने डिएसपी राईको भनाई छ ।
घाईतेहरुको महाराजगञ्ज स्थित शिक्षण अस्पताल र धुलिखेल अस्पतालमा उपचार भईरहेको छ ।
घाइतेहरुलाई नेपाली सेनाको एम आई १७ हेलिकोप्टर मार्फत उपचारका लागि काठमाडौं ल्याइएको हो ।
महाराजगञ्जमा उपचारको लागि आईपुगेका घाईतेहरुले उकालोमा गाडी स्टार्ट बन्द भएको र ब्याक गरेर पुनः स्टार्ट गर्ने क्रममा बस तल खसेको बताएका छन् ।
साघुँरो र कच्ची सडक भएको तथा क्षमता भन्दा बढी यात्रु राखेकाले दुर्घटना भएको हुनसक्ने प्रहरीको अनुमान छ । दुर्घटनास्थल काभ्रे सदरमुकामबाट झन्डै ५० किलोमिटर दूरीमा पर्दछ ।
