काठमाडौं, साउन २८ । प्रधानमन्त्री पुष्पकमल दाहालले खाडीमुलुकका विभिन्न जेलमा रहेका नेपालीको संख्या कति छ र उनीहरुको अवस्था के छ तथ्याङक तत्कालै दिन परराष्ट्र सचिवलाई निर्देशन दिनु भएको छ ।
परराष्ट्रसचिव शंकरदास बैरागीलाई आज प्रधानमन्त्री निवास बालुवाटारमा बोलाइ प्रधानमन्त्री दाहालले खाडी मुलुकमा रहेका नेपालीका समस्याबारे गम्भीर चासो राख्दै जेलमा रहेका नेपालीको ठोस तथ्यांक दिन निर्देशन दिनु भएको हो ।
वैदेशिक रोजगारीको खोजीमा खाडीमुलुक पुगेका नेपालीले दुःख पाएको, उनीहरुको पेसागत् सुरक्षा नभएको तथा जेलमा कस्टकर जीवनयापन गर्न बाध्य भएको समाचार लगातार आउनु मुलुकका लागिसमेत सुहाउँदो विषय नभएको भन्दै प्रधानमन्त्रीले जानकारी माग्नु भएको हो ।
नेपालीको कस्टकर अवस्था र जेलमा रहेका नेपाली नागरिकको रिहाइका लागि तत्काल पहल गर्न निर्देशन दिएको प्रधानमन्त्रीका स्वकीय उपसचिव मनोहरि तिमिल्सनाले जानकारी दिनु भयो ।
भेटमा प्रधानमन्त्रीले खाडीमुलुकमा बन्दीजीवन बिताइरहेका रामचन्द्र तिमिल्सिनाको अवस्थाबारे पनि परराष्ट्र सचिवसँग जानकारी लिनु भएको छ ।
सो अवसरमा परराष्ट्रसचिव वैरागीले तिमिल्सिनाको सहयोगमा निजी क्षेत्रबाट रु २८ लाख संकलन भएको जानकारी गराउनु भएको थियो ।
