काठमाडौं, श्रावण २७।
थरुहट स्वायत्त प्रदेशको माग गर्दै पश्चिम तराईमा सुरु गरिएको आन्दोलनको आज एक बर्ष पुरा भएको छ । आन्दोलनले एक वर्ष पुरा गर्दा समेत उनीहरुको माग सम्बोधन हुन सकेको छैन ।
आन्दोलनको एक बर्ष पुगेको अवसरमा आन्दोलनकारी दल तथा समुहले आज काठमाडौं सहित पश्चिम तराईका बिभिन्न जिल्ला सदरमुकाममा सभा गर्दैछ ।
थरुहट–थारुवान संयुक्त संघर्ष समितिको अगुवाईमा हुने कार्यक्रम अपरान्ह एक बजे हुने नेता किशोर बिश्वासले जानकारी दिनुभयो ।
संघीय गठबन्धनसँग तीन बुँदे सम्झौता गर्दै बर्तमान सरकारले सहमति कार्यान्वयनको प्रक्रिया सुरु गर्दा समेत थारु समुदायलाई भने उपेक्षा गरिएको भन्दै थारु अगुवाहरुले असन्तुष्टि जनाएका छन् ।
थरुहट स्वायत्त प्रदेश र संविधानमा आदिवासी अधिकारको ग्यारेन्टी माग गर्दै बिभिन्न राजनीतिक दल तथा पश्चिम तराईमा क्रियाशील संघसंगठनले गत साउन २७ गतेबाट आन्दोलन सुरु गरेका थिए ।
