एजेन्सी ,१३ साउन ।
सैनिक ‘कु’ को प्रयासलाई समर्थन गरेको आरोपमा टर्की सरकारले १ सय ३१ वटा सञ्चारमाध्यममाथि प्रतिबन्ध लगाएको छ ।
साथै सरकारले ४७ जना पत्रकारलाई पक्राउ गर्न आदेश दिएको छ भने ४२ जनाविरुद्ध वारेन्ट जारी गरेको छ ।
बन्द हुने सन्चारमाध्यममा समाचार संस्था, टेलिभिजन, दैनिक पत्रपत्रिका, म्यागजिन तथा प्रकाशक रहेका छन् ।
गत जुलाई १५ मा भएको कु मा संलग्न भएको आरोपमा तीन वटा समाचार संस्था, १६ वटा टेलिभिजन, ४५ वटा दैनिक पत्रिका तथा १५ म्यागजिन बन्द भएका छन् ।
यस्तै २९ वटा प्रकाशन संस्था पनि बन्द गरिएको छ । बन्द गरिएका सबै सञ्चारमाध्यम अमेरिकासहित पश्चिमा राष्ट्रबाट प्रभावित वा समर्थित रहेको बताइएको छ ।
यस्तै १६ सय ८४ जना सैनिक अधिकारीलाई सरकारले पदमुक्त गरेको छ । जसमा १ सय ४९ जना जनरलसहितका उच्च अधिकारी छन् ।
सरकारले दुई हप्ता अगाडि भएको सैनिक कु को असफल प्रयासमा अमेरिकामा बस्दै आएका धर्म गुरु फतहुल्लाह गुलेनको हात रहेको आरोप लगाउँदै आएको छ ।
गुलेनले भने सैन्य कु मा आफ्नो संलग्न नरहेको बताउने गरेका छन् । सत्ता कब्जाको प्रयासका क्रममा कम्तिमा २ सय ४६ जनाको मृत्यु भएको थियो भने दुई हजारभन्दा बढी घाइते भएका थिए ।
