एजेन्सी ३ साउन ।
अमेरिकाको लुइजियानामा तीन प्रहरी अधिकारीको गोली हानी हत्या गरिएको छ । लुइजियाना राज्यको राजधानी बाटन रुजमा एक आक्रमणकारीले अन्धाधुन्ध गोली प्रहार गरेको अन्तर्राष्ट्रिय सन्चार माध्यमले जनाएका छन् ।
घटनामा अन्य तीन प्रहरी घाइते भएका छन् । घाइते मध्ये एक जनाको अवस्था गम्भीर रहेको बताइएको छ । अन्धाधुन्ध गोली चलाउने आक्रमणकारी प्रहरी कारबाहीका क्रममा मारिएको बिबीसीले जनाएको छ ।
राष्ट्रपति बाराक ओबामाले घटनाको निन्दा गर्दै प्रहरी अधिकारीमाथिको आक्रमण निकै कायर रहेको बताउनु भएको छ । प्रहरीमाथि भइरहेका आक्रमणलाई कुनै पनि हालतमा तर्कसंगत मान्न नसकिने उहाँको भनाई छ ।
केही समयअघि लुइजियानामा एक अश्वेत व्यक्तिको प्रहरीको गोली लागेर ज्यान गएपछि अमेरिकाभर विरोध प्रदर्शन भएको थियो । त्यसपछि घटनाको बिरोधमा डलासमा एक अश्वेत व्यक्तिले पाँच प्रहरी अधिकारीको हत्या गरेका थिए ।
