एजेन्सी,असार ९।
बेलायत युरोपियन युनियन इयुमा रहने वा बाहिरिने भन्ने विषयमा आज जनमत संग्रह हुँदैछ ।
मतदान नेपाली समय अनुसार बिहान पौने १२ बजे सुरु हुने छ । मतपत्रमा बेलायत युरोपियन युनियनको सदस्य रहिरहनु पर्छ की पर्दैन भनेर सोधिने छ ।
मतदाताले पर्छ वा पर्दैन भन्ने पक्षमा आफ्नो निर्णायक मत दिन पाउने छन् । ५० प्रतिशत भन्दा बढी मत ल्याउने पक्ष विजयी भएको मानिने छ ।
बेलायतको इतिहासमा तेस्रो पटक हुन लागेको राष्ट्रिय जनमतसंग्रहमा चार करोड ६४ लाख ९९ हजार पाँच सय ३७ जनाले मतदान गर्ने बेलायती अधिकारीले जनाएका छन् ।
सत्तारुढ कन्जरभेटिभ पार्टी इयुको सदस्य रहनु पर्छ भन्ने पक्षमा छ भने विपक्षी लेबर पार्टीले छोड्न पर्ने पक्षको नेतृत्व गरेको छ । पछिल्ला सर्वेक्षणमा रहनु पर्छ भन्ने पक्षले केही मतले जित्ने देखाएका छन् ।
जनमत संग्रहको अन्तिम परिणाम भोली दिउँसो सम्म आइसक्ने बेलायतको निर्वाचन आयोगले जनाएको छ ।
