एजेन्सी २८ जेठ ।
अमेरिकी राष्ट्रपति बाराक ओबामाले आगामी नोभेम्बरमा हुने राष्ट्रपति निर्वाचनका लागि डेमोक्राटिक पार्टीका तर्फबाट हिलारी क्लिन्टनको उमेदवारीलाई आधिकारिक रुपमा समर्थन गर्नुभएको छ ।
राष्ट्रपति ओबामाले सिनेटर सान्ड्रेससँगको छलफल पछि क्लिन्टनलाई आफ्नो समर्थन रहेको औपचारिक घोषणा गर्नुभएको हो । राष्ट्रपतिको निर्वाचनका लागि डेमोक्राटिक पार्टीका तर्फबाट क्लिन्टन र सिनेटर बर्नी सान्ड्रेस प्रतिस्पर्धामा छन् ।
ओबामाले एक भिडियो सन्देश जारी गर्दै क्लिन्टन राष्ट्रपतिको जिम्मेवारीका लागि अहिलेसम्मकै उत्कृष्ट र योग्य व्यक्ति रहेको बताउनुभएको छ ।
राष्ट्रपति ओबामा र क्लिन्टनले चाँडै नै राष्ट्रपति चुनावको संयुक्त प्रचारप्रसार अभियान सुरु गर्ने तयारी गरेका छन् । सन् २००८ मा ओबामा र क्लिन्टन राष्ट्रपति उम्मेदवारीका लागि प्रतिस्पर्धामा थिए ।
