एजेन्सी ३० वैशाख ।
इराकको राजधानी बग्दादमा भएको श्रृंखलाबद्ध कार बम बिस्फोटमा ९३ जनाको मृत्यु भएको छ । बिस्फोटमा अन्य ८७ जना घाइते भएको अन्तर्राष्ट्रिय सन्चारमाध्यमले जनाएका छन् ।
घाइतेहरु मध्ये अधिकांशको अवस्था गम्भिर रहेको बताइएको छ । बग्दादमा भएको यो बिस्फोट अहिलेसम्मकै सबैभन्दा घातक भएको स्थानीय अधिकारीलाई उधृत गर्दै बिबीसीले जनाएको छ ।
व्यस्त बजारमा भएको पहिलो बिस्फोटमा मारिनेमा अधिकांश महिला तथा बालबालिका रहेको प्रत्यक्षदर्शीले बताएका छन् । राजधानी बग्दादस्थित सिया मुस्लिम समुदायको बाहुल्यता रहेको साद्र शहरमा भएको उक्त बिस्फोटपछि थप दुईवटा कार बम विस्फोट भएको प्रहरीले जनाएको छ ।
प्रहरीका अनुसार अरु दुई वटा आत्मघाती विस्फोट उत्तरी कदीमिया क्षेत्रमा रहेको प्रहरीको चेकप्वाइन्टलाई लक्षित गरी र पश्चिमी क्षेत्रमा गराइएको विस्फोटमा २९ जनाको ज्यान गएको छ । विस्फोटको जिम्मा विद्रोही संगठन इस्लामिक स्टेट आईएसले लिएको छ ।
