एजेन्सी १४ वैशाख ।
अमेरिकी राष्ट्रपति बाराक ओबामाका साथै पश्चिमा राष्ट्रका नेताहरुले सिरियाका विद्रोही समुहलाई युद्ध विरामको पालना गर्न आग्रह गरेका छन् ।
जर्मनीको हनोफरमा अमेरिकी राष्ट्रपति ओबामा तथा बेलायत, फ्रान्स, जर्मनी तथा इटालीका नेताबिच भएको भेटपछि उनीहरुले यस्तो आग्रह गरेका हुन् ।
सिरियामा अहिले अल्पकालिन युद्ध विराम लागु भएको छ । तर सरकारी तथा विद्रोही समुह दुवैले हिंसात्मक आक्रमण रोकेका छैनन् । दुवै पक्षले एकअर्कामाथि युद्ध विराम तोडेको आरोप लगाउने गरेका छन् ।
संयुक्त राष्ट्रसंघको मध्यस्थतामा शान्तिवार्ता गर्नका लागि अल्पकालिन युद्ध विराम लागु भएपछि सिरियमा हिंसा केही कम भएको छ । तर एलेप्पो शहरमा पछिल्लो समय फेरि युद्ध भएका छन् ।
यसले गर्दा अल्पकालिन युद्ध विराम भंग हुने अवस्थामा पुगेको छ । तर अमेरिका सहितका पश्चिमा देशका नेताले युद्ध विरामलाई कायम राखेर शान्तिवार्ता गराउन प्रयास गरेका छन् ।
