काठमाडौ १३ वैशाख ।
ईयूबाट बाहिरिंदा विश्वस्तरमा बेलायतको प्रभाव कम हुने भन्दै अमेरिकी राष्ट्रपति बराक ओबामाले दिनु भएको अभिव्यक्तिप्रति बेलायती नेताहरु रुष्ट बनेका छन् ।
बेलायत भ्रमणका क्रममा ओबामाले बेलायत युरोपेली संघबाट बाहिरिएमा उसलाई अमेरिकासँग कारोबारको सम्बन्ध बनाउन अर्को दश वर्ष लाग्ने बताउनु भएको थियो ।
ओबामाको भनाईप्रति इयुबाट बेलायत बाहिरिनु पर्ने अभियान चलाइरहेका नेताहरु रुष्ट बनेका हुन् । यूके आईपीका नेता निगेल फराजले ओबामाको अभिव्यक्तिलाई बकवासको संज्ञा दिनुभएको छ ।
कुनैपनि अमेरिकी राष्ट्रपतिले लण्डनमा आएर दिने धम्कीलाई आफूहरुले पचाउन नसक्ने उहाको भनाइ थियो ।
ओमन र अष्ट्रेलिया जस्ता मुलुक अमेरिकासँग व्यापारिक सम्बन्ध बनाइरहेको भन्दै फराजले ओबामाले बेलायतलाई पाठ पढाउन जरुरी नरहेको बताउनुभयो ।
लेबर पार्टीका सांसद गिसेल स्टुअर्टले पनि दबाब दिनु अनुचित भएको टिप्पणी गर्नुभयो ।
