अतिवादी इस्लामिक संगठन बोको हरामले विभिन्न स्थानमा आत्मघाती बम विस्फोटमा बालबालिकाको प्रयोग गर्ने क्रम बढेको संयुक्त राष्ट्रसंघले जनाएको छ ।
पछिल्लो एक बर्षमा बोको हरामले गराएका प्रत्येक ५ आत्मघाती विस्फोटमा एउटामा बालबालिका प्रयोग भएको राष्ट्रसंघको बालबालिकासम्बन्धी नियोग युनिसेफले जनाएको छ ।
क्यामरुन, नाइजेरिया र चाडमा सो समुहले गराएको आक्रमणमध्ये तीन चौथाईमा बालिकाहरुको प्रयोग भएको भेटिएको छ । सन २०१४ देखि १६ को बीचमा यस्ता कार्यमा बालबालिकाको प्रयोग ११ गुणाले बढेको युनिसेफको तथ्यांकमा उल्लेख छ ।
बोको हरामले नाइजेरियाको चिबोक क्षेत्रस्थित विद्यालयबाट २ वर्षअघि २ सय बालिकाको अपहरण गरेको थियो । ती बालिकाको रिहाकालागि विश्वव्यापी रुपमा अभियान नै सञ्चालन गरिएको भएपनि हालसम्म उनीहरुको अवस्था अज्ञात छ ।
नाइजेरियामा ७ बर्ष चलेको गृहयुद्धका क्रममा बढी प्रभावित बनेको उत्तरपूर्वी क्षेत्र र छिमेकी चाडमा करिब १७ हजार मानिसले ज्यान गुमाएका थिए । सो अवधीमा करिब १३ लाख बालबालिका घरबार छोड्न बाध्य भएको अन्तर्रा्ष्ट्रिय सञ्चार माध्यमले जनाएका छन् ।
