इटहरी, चैत्र ११
पूर्व–पश्चिम राजमार्गअन्तर्गत सुनसरीको इटहरी उपमहानगरपालिका–१९ मा आज बिहान ट्याक्टर दुर्घटनामा परी दुई जनाको ज्यान गएको छ ।
पश्चिमबाट पूर्वतर्फ जाँदै गरेको स. १ त ३२८८ नम्बरको ट्याक्टर अनियन्त्रित भई राजमार्गको छेउमा रहेको कलभर्टमा ठक्कर खाँदा दुई जनाको ज्यान गएको हो । मृत्यु हुनेमा चितवन नारायणघाट बस्ने अन्दाजी २० वर्षीय गौरव राय क्षेत्री रहेका छन् भने एक जनाको नाम थर खुल्न नसकेको जिल्ला प्रहरी कार्यालय सुनसरीले जनाएको छ ।
दुर्घटनामा परी घाइते भएका मृतकद्वयको उपचारका लागि जिल्ला अस्पताल इनरुवा ल्याउने क्रममा बीच बाटोमा नै मृत्यु भएको सुनसरीका प्रहरी उपरीक्षक पोषराज पोखरेलले जानकारी दिएका छन् ।
उपरीक्षक पोखरेलले दिएको जानकारीअनुसार शव परीक्षणका लागि जिल्ला अस्पताल इनरुवामा राखिएको छ भने ट्याक्टर प्रहरीको नियन्त्रणमा लिइसकेको छ ।
