नाइजेरियामा द्वन्द्वका कारण विस्थापित भएका नागरिक बस्दै आएको शिविरमा आत्मघाती बम विस्फोट हुँदा ६० जनाको मृत्यु भएको छ ।
नाइजेरियाको उत्तरपूर्वी शहर दिकवामा रहेको शिविरमा दुई जना महिला आत्मघाती आक्रमणकारीले विस्फोट गराउँदा ६० जना भन्दा धेरैको मृत्यु बीबीसीले जनाएको छ ।
बिद्रोही संगठन बोको हरामको हिंसात्मक गतिविधिको केन्द्र रहँदै आएको बोर्नो राज्यको राजधानी मैदुगुरीबाट ८५ किलोमिटर टाढा रहेको शिविरमा विस्फोट भएको हो ।
बोको हरामको हिंसाका कारण आन्तरिक रुपमा विस्थापित भएका मानिस बस्दै आएको शिविरमा आत्मघाती आक्रमणकारी प्रवेश गरेर शिविरको बिच भागमा आफैलाई विस्फोट गराएको सरकारी अधिकारीले जनाएका छन् ।
आक्रणमा बोको हरामको संलग्नता हुनसक्ने आशंका गरिए पनि घटनाको अहिलेसम्म कसैले पनि जिम्मेवारी लिएको छैन । गएको जनवरी ३१ मा मैदुगुरीको बाहिरी क्षेत्रमा भएको आक्रमणमा कम्तिमा ६५ जनाको मृत्यु भएको थियो ।
