एजेन्सी २० माघ ।
साउदी अरेबियाको एक अदालतले इस्लाम नमानेको आरोपमा दोषी ठहर गरेका प्यालेस्टिनीमूलका एक कविलाई आठ वर्ष कैदको सजाय सुनाएको छ ।
अशरफ फयाज नाम गरेका कविलाई यसअघि तल्लो अदालतले मृत्युदण्डको सजाय दिएकोमा माथिल्लो अदालतले सो फैसला उल्टाउँदै उक्त सजाय तोकेको हो ।
उनलाई अगस्ट २०१३ मा पक्राउ गरिएकोमा त्यसको भोलिपल्टै रिहा गरिएको थियो । जनवरी २०१४ मा पुनः पक्राउ परेका उनलाई धर्म परित्याग गरेको आरोपमा कानुनी कारवाही अघि बढाइएको थियो ।
साउदी अरबमै जन्मिएका फयाज प्यालेस्टिनी शरणार्थी परिवारका सदस्य हुन् । उनीमाथि नास्तिकताको प्रचार गरेको तथा इस्लाम धर्मविरुद्ध लागेको आरोपमा मुद्दा चलाइएको थियो ।
यसका अतिरिक्त ८०० कोर्राको सजाय १६ पटकमा पुरा गर्नुपर्ने शर्त पनि अदालतले राखेको छ । अदालतको सो निर्णयविरुद्ध पुनः अपिल गरिने र उनको रिहाई माग गरिने वकिल लहीमले जानकारी दिएका छन् ।
