साउदी अरब, २ माघ ।
नेपाल र साउदी अरबबीच छिट्टै श्रम सम्झौता हुने भएको छ । रियादमा भएको दुई देशबीचका प्रतिनिधिमण्डलको वार्ताले श्रम सम्झौताको मस्यौदालाई अन्तिम रुप दिएपछि श्रम सम्झौता हुने निश्चित भएको हो ।
श्रम तथा रोजगार मन्त्रालयका सचिव रामकुमार आचार्यको नेतृत्वमा आएको प्राविधिक टोली र साउदीको डेपुटी मिनिस्टरस्तरीय वार्ताले श्रम सम्झौताको मस्यौदालाई अन्तिम रुप दिएको हो । वार्तामा दुई देशबीच घरेलु कामदारलगायत सबै प्रकारका कामदारसम्बन्धी सम्झौता गर्ने निर्णयसमेत भएको छ । दुई दिनसम्म चलेको द्विपक्षीय प्राविधिक टोलीको वार्ताले श्रम सम्झौताका लागि अन्तिम खाका तयार गरेको हो ।
यसअघि घरेलु कामदारको विषयमा मात्र चासो दिएको साउदी अरबले नेपालले सबै कामदारका लागि सम्झौता गर्नुपर्ने अडान लिएपछि दुवै खालको श्रम सम्झौता हुने भएको हो ।
साउदीका लागि कार्यवाहक नेपाली राजदूत आनन्दप्रसाद शर्माले साउदीसँग श्रम सम्झौताका लागि सबै तयारी पूरा भएको बताउनुभयो । श्रम सम्झौताका लागि घरेलु तथा सबै खालका कामदारका विषयमा दुई देशका श्रम अधिकारीबीच छलफल भई अन्तिम मस्यौदा तयार गरिएको उहाँले जानकारी दिनुभयो ।
वार्तामा मूलतः प्रस्तावित श्रम सम्झौता, घरेलु महिला कामदार तथा अन्य सबै प्रकारका कामदार, तलब सेवा सुविधा, कामदारका हक हितलगायत विषयमा छलफल भएको थियो ।
पछिल्लो समय नेपाली कामदारका लागि साउदी अरब ठूलो श्रम बजारको रुपमा लिइएको छ । साउदी अरबसँग लामो समयदेखि श्रम सम्झौता हुन नसक्दा नेपाली कामदारले निकै जटिल र गम्भीर खालका समस्या भोग्नु परेको छ । सम्झौताअनुसारको काम नपाउनु, काम गरेको तलब नपाउनु, तोकिएको अवधिभन्दा बढी काम गर्नुपर्ने बाध्यता, करार अवधि सकिएपनि स्वदेश फर्कन नपाउनेलगायत समस्या नेपाली कामदारले भोग्ने गरेका छन् । रास
