एजेन्सी ४ पुस । संयुक्त राष्ट्रसंघको सुरक्षा परिषदले सिरियाको शान्ति प्रक्रिया सम्बन्धी प्रस्ताव सर्वसम्मतले पारित गरेको छ ।
राष्ट्रसंघको मुख्यालय अमेरिकाको न्युयोर्कमा भएको सुरक्षा परिषदको बैठकमा १५ सदस्य राष्ट्रबीच सिरिया सम्बन्धी महत्वपूर्ण मुद्दामा सहमति भएको हो । सिरिया सरकार र विपक्षीबीच आउँदो जनवरीको सुरुमा वार्ता गराउने तथा युद्धविराम लागु गराउने विषयमा सुरक्षा परिषदमा सहमति जुटेको हो ।
सिरियामा द्वन्द्व सुरु भएको पाँच वर्ष पुग्न लागेको छ । यस अवधिमा साढे दुई लाख भन्दा धेरै मानिसको ज्यान गएको संयुक्त राष्ट्रसंघले जनाएको छ । यस्तै द्वन्द्वकै कारण लाखौं मानिस विस्थापित भएको राष्ट्रसंघले जनाएको छ ।
प्रस्तावमा सिरिया सरकार र विपक्षीबीच सहमति वार्ता गराउने उल्लेख भएपनि आतंकवादी संगठन विरुद्धको कारवाही अभियानमा भने प्रभाव नपर्ने उल्लेख गरिएको छ ।
