एजेन्सी २६ मंसिर ।
मुस्लिम शासन रहेको साउदी अरेबियामा पहिलो पटक आज महिलाहरु मतदानमा सहभागी हुदैछन् । इतिहाँसमै पहिलो पटक उनीहरुले नगरपालिकाको निर्वाचनमा आफ्नो मताधिकारको प्रयोग गर्न पाएका हुन् ।
रुढीवादी परम्परा र संस्कारको आधारमा चल्दै आएको राजतन्त्रात्मक मुलुक साउदी अरबका महिलालाई पहिलो पटक मताधिकारका अतिरिक्त निर्वाचनमा उम्मेदवार बन्ने अधिकार समेत दिइएको छ ।
निर्वाचनमार्फत् ९ सय ७८ जना महिला आफ्नो भाग्य परीक्षण गर्दैछन् भने करीब एक लाख ३० हजार महिलाले मत प्रयोग गर्न आफ्नो नाम दर्ता गराएका छन् । यस्तै झण्डै ६ हजार पुरुष पनि प्रतिष्पर्धाको मैदानमा छन् ।
महिलालाई मताधिकार सुनिश्चित गराउने काम भने दिवंगत राजा अब्दुल्लाहले गर्नु भएको हो । आफ्नो मृत्यु पूर्व राजा अब्दुल्लाहले मुलुकको माथिल्लो सल्लाहकार परिषद शूरामा पनि ३० जना महिलालाई मनोनित गर्नु भएको थियो ।
