काठमाडौ २३ मंसिर ।
भारतको छत्तीसगढमा प्रहरी र माओवादीबिच भएको झडपमा कम्तिमा १५ जना माओवादी मारिएको भारतीय अधिकारीहरुले दावी गरेका छन् । छत्तीसगढ स्थित सुकमा जिल्लामा उक्त झडप भएको अन्तर्राष्ट्रिय सन्चार माध्यमले जनाएका छन् ।
झडपमा १५ देखि २० जना माओवादीका कार्यकर्ता मारिएको प्रहरी आइजी एसआरपी कल्लुरीलाइइ उधृत गर्दै बिबीसीले जनाएको छ । झडपमा पाँच जना प्रहरी जवान गम्भीर घाइते भएका छन् । घटनाको स्वतन्त्र पुष्टी हुन बाँकी रहेको बताइएको छ ।
माओवादीका पिपुल्स लिबरेशन गुरिल्ला आर्मीले दुईदेखि आठ डिसेम्बरसम्म १५ औं वर्षगाठ मनाएको थियो । त्यसक्रममा सुकमा जिल्लाको किस्ताराम क्षेत्रमा माओवादीको बैठक बसेको सूचनाको आधारमा आक्रमण गरिएको प्रहरीले जनाएको छ ।
यस्तै सुकमा जिल्लाको पोलमपल्लीमा २५ जना माओवादी कार्यकर्ताले आत्मसमर्पण गरेको प्रहरीले जनाएको छ ।
