एजेन्सी, ५मंसिर ।
संयुक्त राष्ट्रसंघको सुरक्षा परिषदले इस्लामिक स्टेट आइएस विरुद्धको कारवाही बढाउने सम्बन्धी प्रस्ताव सर्वसम्मतिले पारित गरेको छ । गएको हप्ता फ्रान्सको राजधानी पेरिसमा एक सय ३० जनाको ज्यान जाने गरी भएको आक्रमणको जिम्मा आइएसले लिएको थियो ।
आइएस विरुद्धको कारवाही दोब्बर पार्ने सम्बन्धी फ्रान्सले गरेको प्रस्ताव सुरक्षा परिषदले सर्वसम्मतिले पारित गरेको हो । प्रस्तावमा आइएस विरुद्धको कारवाहीका लागि राष्ट्रसंघका सदस्य राष्ट्रलाई सम्भव भएका सबै उपाय पनाउने प्रस्ताव गरिएको छ ।
राष्ट्रसंघको सुरक्षा परिषदले आइएससहितका अरु विद्रोही संगठनलाई नष्ट गर्न आआफ्नो तर्फबाट सहयोग गर्न सदस्य राष्ट्रसँग आग्रह पनि गरेको छ । प्रस्तावमा आतंककारी तथा उनीहरुको आक्रमण रोक्नका लागि भइरेका प्रयासलाई बढाउन तथा सहकार्य गर्न जोड दिएको छ ।
प्रस्तावमा सैन्य बल प्रयोग गर्ने सम्बन्धी राष्ट्रसंघको च्याप्टर सेभेन प्रयोग गर्नका लागि भने आह्वान गरिएको छैन ।
