एजेन्सी ३ मंसिर ।
गत शुक्रवार फ्रान्सको पेरिसमा १ सय २९ जनाको ज्यान जाने गरी भएको श्रृंखलाबद्ध आक्रमणको मुख्य योजनाकारको खोजी तिब्र पारिएको छ ।
आक्रमणका मुख्य योजनाकारसमेत लुकेको आशंकामा हिजो उत्तरी पेरिसको सेन्ट डेनिसमा गरिएको सुरक्षा कारवाहीमा आशंकित आठ जनालाई पक्राउ गरेपनि मूख्य अभियुक्त भने पक्राउ नपरेको प्रहरीले जनाएको छ ।
यद्यपी, यस कारवाही मार्फत अर्को ठूलो दूर्घटना हुनबाट मुलुकलाई जोगाएको फ्रान्सेली प्रहरीको दावी छ । आक्रमणको मास्टरमाइण्ड मानिएका अब्देलहामिद अबाउद कहाँ छन् भन्नेबारे अहिलेसम्म कुनै सूचना प्राप्त नभएको पनि मूख्य अभियोजनकर्ता फ्राँस्वा माँलीले बताउनु भएको छ ।
प्रहरीले सात घण्टासम्म गरेको कारवाहीमा पाँच हजार गोली प्रहार गरेकोसमेत खबरमा उल्लेख छ । उक्त कारवाहीमा मारिएका दुई मध्ये एकमा अबाउदको नातेदार एक महिला रहेको र उनले आफैंलाई विष्फोट गराएकी छिन् ।
घटनामा केही सुरक्षाकर्मी पनि घाइते भएका छन् । अपराधीको खोजीमा प्रहरीले लगातार अनुसन्धान जारी राखेको छ भने सुरक्षाका लागि व्यापक रुपमा सैनिक परिचालन गरेको छ ।
