एजेन्सी १२ कार्तिक ।
सिरिया संकटबारे अष्ट्रियाको भियनामा हुने बहुपक्षीय वार्तामा इरान पनि सहभागी हुने भएका छन् ।
आफूहरुलाई आएको निम्तोकोलाई स्विकार गर्दै विदेशमन्त्री जावेद जरिफले वार्तामा सहभागिता जनाउने विदेश मन्त्रालयका प्रवक्ता मर्जीह अफखमले जानकारी दिनुभयो ।
इरान अमेरिकाको साथमा हुन लागेको यस्तो बहुपक्षीय वार्तामा सहभागी हुन लागेको यो पहिलोपल्ट हो । वार्तामा रुस, सउदी अरब र टर्कीका साथै सिरिया र इराकका प्रतिनिधि पनि सामेल रहने छन् ।
आज बेलुकीदेखि नै वार्ता सुरु हुने र भोली टुंगोमा पुग्न सकिने बताइएको छ । सिरियाली विपक्षीले भने इरानको संलग्नताले स्थिति जटिल हुने आशंका गरेको छ ।
इरानले बितेको चार वर्षमा सिरियाका राष्ट्रपति बशर अल असदको सत्ता टिकाउन अरबौं डलर खर्चेको असदका विपक्षीले आरोप लगाउँदै आएका छन् ।
सिरियाको मामलामा अमेरिकाले आफ्नो नीति प्रष्ट गर्न नसकेको आरोप छ भने रुसले राष्ट्रपति बशर अल असदको पक्षमा खुलेर समर्थन दिँदै आएको छ ।
यता रुसले भने २४ घण्टाको अन्तरालमा अतिवादीको ११८ केन्द्रमा लडाकू विमानले आक्रमण गरेको पनि जनाएको छ ।
