म्यानमारमा आगामी महिना हुन लागेको संसदीय निर्वाचनको तयारी लगभग पूरा भएको र सो तयारीको अन्तिम चरण जारी रहेको निर्वाचन अधिकारीले जानकारी दिएका छन् ।
अधिकारीहरुका अनुसार आगामी नोभेम्बरको ८ तारिखमा हुन लागेको सो ऐतिहासिक निर्वाचनका लागि सरकारले निर्वाचन आयोगलाई आवश्यक सहयोग उपलब्ध गराइरहेको बताएका छन् ।
करिब दुई दशकपछि म्यानमारमा राजनीतिक दलहरुको बृहत् सहभागितामा संसदको निर्वाचन हुन लागेको हो ।
निर्वाचन आयोगका अध्यक्ष उ तिन आयले सो निर्वाचनका लागि ६ हजार ६५ जनाले उम्मेदवारी दिएका जानकारी दिनुभयो । विगतका निर्वाचनहरुका भन्दा यो उम्मेदवार सङ्ख्या रहेकोमा ८०० जना महिला उम्मेदवार रहेका छन् भने निर्वाचनमा ९१ वटा राजनीतिक दलले सहभागिता जनाएका छन् । त्यस्तै ३१० वटा स्वतन्त्र व्यक्तिले पनि सो निर्वाचनमा प्रतिस्पर्धा गर्नेछन् ।
४० हजार ५१६ मतदान केन्द्र राखिएको म्यानमारमा देशभरका केन्द्रीय र क्षेत्रीय गरी चार तहका संसदमा छानिले १ हजार १६३ स्थानका लागि नोभेम्बर ८ मा मतदान हुनेछ । सो निर्वाचनमा मतदान गर्ने वैधानिक मतदाताको सङ्ख्या तीन करोड ५० लाख रहेको छ ।
त्यसैगरी म्यानमारको निर्वाचन आयोगले यस पटकका लागि विदेशमा रहेका नागरिकबाट पनि मतदानको व्यवस्था मिलाएको छ । त्यसका लागि करिब ४४ वटा देशका दूतावासमा पनि मदतानका लागि मत पेटिका राखिएको जनाइएको छ ।
यस निर्वाचनमा म्यानमारकी प्रजातन्त्रवादी नेत्री आङ सान सुकीले पनि प्रतिस्पर्धा गर्दै हुनहुन्छ ।
