सिरियाली राष्ट्रपति बसार अल आसादले आफ्नो सरकारलाई रसिया र इरानको सहयोग रहेको बताउँदै सो सहयोगको स्वागत गर्नुभएको छ ।
सिरियाली सामाचार समिति सानाले बताएअनुसार राष्ट्रपति आसादले आफ्नो सरकारलाई रसिया र इरानको सहयोग रहेको र त्यसले आगामी दिनमा पनि निरन्तरता पाउने उहाँको आसय छ ।
इरानको संसदीय समितिका एकजना प्रमुखसँगको भेटका क्रममा बिहीबार उहाँले सो धारणा राख्नुभएको हो ।
उहाँले यी दुई देशको सहयोगको सराहना पनि गर्नुभएको थियो । साथै उहाँले रसियाली प्रतिनिधिसँगको भेटका क्रममा रसियाले सिरियामा आतङ्ककारीका विरुद्ध जारी राखेको कारबाही निकै प्रभावकारी रहेको बताउनुभयो ।
सिरियामा गएको करिब साढे चार वर्षदेखि हिंसा जारी रहेको छ । त्यहाँ जारी गृहयुद्धका क्रममा करिब साढे दुई लाख नागरिकले ज्यान गुमाइसकेका छन् ।
राष्ट्रपति आसादले पद त्याग्नुपर्ने आवाज सिरियाली विपक्षीका साथै अन्तर्राष्ट्रिय समुदायको पनि रहेको भए पनि उहाँले मान्नुभएको छैन ।
पछिल्लो समयमा अमेरिकी नेतृत्वको संयुक्त सेनाका साथै रसियाली सेनाले नै सिरियामा हवाई कारबाही गरिरहेका छन् ।
