काबुल, १४ असोज ।
तालिवान सशस्त्र आतङ्ककारीहरुका विरुद्धमा अफगानिस्तानमा जारी सैनिक कारबाहीमा परी कम्तीमा पनि १४ जना तालिवान मारिएको समाचार छ ।
अफगान गृह मन्त्रालयले शनिबार प्रकाशन गरेको विज्ञप्तिमा सो जानकारी दिइएको छ । पछिल्लो समयमा अफगानिस्तानमा तालिवानले सुरक्षाकर्मी र सर्वसाधारणको हत्या गर्ने गरेकोले अफगान सेनाले पनि तालिवानका विरुद्धमा हवाई तथा स्थलगत सैन्य कारबाही गर्ने गरेको छ ।
सो कारबाहीका क्रममा गत २४ घण्टाभित्र १४ जना तालिवान आतङ्ककारी मारिनुका साथै ३० जना घाइते भएका जनाइएको छ । कारबाहीका साथै त्यस क्रममा विभिन्न स्थानमा झडप पनि भएको थियो ।
अफगानिस्तानको विभिन्न प्रान्तमा जारी यस कारबाहीको क्रममा केही आतङ्ककारीहरु पक्राउ परेको समेत जनाइएको छ । सेनाले ठूलो सङ्ख्यामा हतियार पनि कब्जा गरेको छ ।
अफगानिस्तानमा रहेका नेटोसँग आबद्ध सैनिक अफगान युद्ध सकिएको घोषणा गरी गत जनवरीबाट स्वदेश फर्किएका छन् । तर अफगानिस्तानमा सुरक्षा भने कायम हुन सकिरहेको छैन ।
