एजेन्सी,९ असोज ।
दश करोड वर्ष पुराना दुर्लभ किराहरुको अवशेषको एक महिना लामो प्रदर्शनी चीनको सिचुवान प्रान्तको चेङ्खु शहरमा सुरु भएको छ ।
पश्चिम चीनमा अवस्थित किरा फट्याङ्ग्राहरुको सङ्ग्रहालयमा केही धेरै पुराना जातको कमिला, पानीपिच्चा (ड्रागन फ्लाई), माहुरी तथा अन्य किराहरुको अवशेष प्रदर्शनीका लागि राखिने छ । प्रदर्शनीमा राखिएका कतिपय किराहरुको अवशेष जुरासिक कालभन्दा पहिलेका भएको आयोजकले जनाएको छ ।
साना र छिट्टै नष्ट हुने भएकाले यस्ता पुराना किटाणुहरुको अवशेष कमै मात्र सङ्ग्रहित गरिएको पाइन्छ, उक्त सङ्ग्रहालयका प्रमुख झाओलिले बताउनुभयो । प्रदर्शनीमा राखिएका सबैभन्दा मूल्यवान, अवशेष कमिलाको भएको आयोजकको दावी छ ।
यिनीहरुको अवशेष १६ करोड ५० लाख वर्ष पुराना प्रजाती भएको आयोजकको दावी छ । अवशेष अमेरिकी अध्ययनबाट पत्तालागेका कमिलाका प्रजातिभन्दा चार करोड ५० लाख पुराना भएको दावी चीनले गरेको छ ।
पश्चिम चीनमा अवस्थित उक्त सङ्ग्रहालय किराहरुको एसियाकै सबैभन्दा ठूलो सङ्ग्रहालय हो । यहाँ विभिन्न ४० देशबाट चार लाख किराहरुका नमूना संकलन गरी राखिएको उक्त सङ्ग्रहालयले जनाएको छ ।
