एजेन्सी,१७ भदौ ।
चीनका राष्ट्रपति शी जिनपिङले तीन लाख सेना कटौती गर्ने घोषणा गर्नुभएको छ । दोस्रो विश्वयुद्ध अन्त्य भएको ७० औं वार्षिकोत्सवका अवसरमा आज आयोजित कार्यक्रममा उहाले यस्तो घोषणा गर्नुभएको हो ।
चीनको ‘पिपुल्स लिबरेशन आर्मी’ संख्यात्मक हिसाबले विश्वकै सबैभन्दा ठूलो सेना मानिन्छ । चीनमा लगभग २३ लाख सैनिक छन् । चिनियाँ सेनाको वार्षिक बजेट १४१ अर्ब डलर छ जो विश्वमै दोस्रो ठूलो सैन्य बजेट हो ।
दोस्रो विश्वयुद्ध अन्त्य भएको ७० औं वार्षिकोत्सवका अवसरमा चीनले बेइजिङमा विशाल सैन्य परेड आयोजना गरेको छ । राजधानी बेइजिङको तियानमैनमा भएको सैन्य परेडमा १२ हजारभन्दा बढी सेनाले सैन्य कौशल प्रस्तुत गरेका छन ।
सो कार्यक्रममा रुसी राष्ट्रपति भ्लादिमिर पुटिन, संयुक्त राष्ट्रसंघका महासचिव बान कि मुन, दक्षिण कोरिया, पाकिस्तान, क्युवालगायत बिभिन्न ३० देशका प्रतिनिधी बेइजिङ आएका थिए ।
