एजेन्सी, १९ साउन ।
भारतीय गुप्तचर संस्था ‘आइबी’ले बजारमा चार सय करोड रुपैयाँ बराबरको भारतीय नक्कली नोट उपलब्ध रहेको जनाएको छ । राष्ट्रिय जाँच एजेन्सीका तर्फबाट गरिएको पछिल्लो अध्ययनका क्रममा उक्त तथ्य प्रकाशमा आएको हो ।
प्रत्येक वर्ष ७० करोड भारतीय नक्कली नोट बजारमा आउने गरेको पनि सो अध्ययनको खुलासा गरेको छ । भारतीय गुप्तचर निकाय ‘आइबी’ले गरेको अध्ययन पछि सार्वजनिक भएको प्रतिवेदनले करिब २५ सय करोड रुपैयाँ नक्कली नोटमा समाहित रहेको पनि जनाएको छ ।
नक्कली नोटको कागज, मसीको अध्ययनबाट त्यस्ता नोट पाकिस्तानमा बनेको पुष्टि भएको समेत जनाइएको छ । अध्ययनका क्रममा प्रति दश लाख नोटमा दुई सय ५० नोट नक्कली पाइएको पनि खुलासा गरिएको छ । बजारमा १०० र ५०० दरको नक्कली नोट बढीमात्रामा पाइएको पनि जनाइएको छ ।
नक्कली नोटको छपाई एउटै कागजमा हुने गरेको तर असली नोट दुई अलग कागजमा छापेर त्यसलाई बीचमा टासिने भएकाले आम रुपमा नक्कली र असली नोटबीच १२ भिन्नता रहने गरेको अधिकारीहरुले बताएका छन ।
