एजेन्सी, १९ असार ।
अन्तर्राष्ट्रिय ऋणदाताको शर्त स्विकार्ने या नस्विकार्ने भन्नेमा ग्रीसले भोली जनमत संग्रह गर्दैछ ।
जनमत संग्रहको पूर्वसन्ध्यामा ग्रीसका प्रधानमन्त्री एलेक्सिस सिप्रासले अन्तरर्रष्ट्रिय ऋणदाताले गरिरहेको ब्ल्याकमेललाई अस्विकार गर्ने पक्षमा मतदान गर्न आम जनतालाई अपिल गर्नु भएको छ ।
ऋणदाताका शर्त अस्वीकार गर्दैमा यूरोपेली संघबाट आफ्नो सदस्यता कसैले खोस्न नसक्ने प्रधानमन्त्री सिप्रासको दावी छ । यता यूरोपेली संघका नेताहरुले भने शर्त नस्विकारेमा ग्रीस यूरोजोनबाट बाहिरिनुपर्ने चेतावनी दिइरहेका छन् । गम्भिर आर्थिक संकटमा फसेको ग्रीस दाताहरुको ऋण चुकाउन नसक्दा टाट पल्टने अवस्थामा पुगेको छ ।
दाताको शर्त नस्विकारेको खन्डमा ग्रीसको स्थिति झनै कमजोर बन्ने यूरोपिय संघका अध्यक्ष ज्या क्लाँड युंकरले बताउनु भएको छ । जुन ३० मा अन्तर्राष्ट्रिय मुद्रा कोषको डेढ अर्बभन्दा बढी डलर तिर्न नसकेपछि ग्रीस खराबी ऋणीहरुको सूचीमा परिसकेको छ ।
