वीरगञ्ज २५ कार्तिक । आस्था, श्रद्धा र भक्तिको महापर्व छठ पूजालाई विशेष सम्मान प्रदान गर्दै नेपाली सेनाले यस वर्ष पनि छठी माई तथा सूर्य भगवानलाई विशेष सैनिक सलामी अर्पण गर्ने भएको छ।
छठ पर्वको धार्मिक, सांस्कृतिक तथा सामाजिक महत्त्वलाई सम्मान गर्दै नेपाली सेनाले वीरगञ्जमा गत वर्षदेखि सुरु गरेको विशेष सलामी कार्यक्रमलाई यस वर्ष पनि निरन्तरता दिन लागेको हो।
छठ पर्वको मुख्य दिन कात्तिक २९ गते आइतबार साँझ वीरगञ्ज महानगरपालिका–१० स्थित ऐतिहासिक घडिअर्वा छठघाटमा नेपाली सेनाको टोलीले विशेष सैनिक विधिअनुसार छठी माई र सूर्य भगवानलाई सलामी अर्पण गर्ने कार्यक्रम तय भएको छ। यस कार्यक्रमले छठ पर्वको धार्मिक महत्त्वलाई थप उजागर गर्नुका साथै नेपाली सेना र स्थानीय धार्मिक तथा सांस्कृतिक समुदायबीचको सम्बन्धलाई पनि थप प्रगाढ बनाउने अपेक्षा गरिएको छ।
वीरगञ्जस्थित पानी टङ्कीमा रहेको नेपाली सेनाको श्री श्रीजंग गणबाट प्रमुख सेनानी लोकेन्द्र कार्कीको नेतृत्वमा सैनिक टोली उक्त कार्यक्रममा सहभागी हुनेछ। सेनाको वाद्यवादनसहितको विशेष परेड र मार्चपास गर्दै सैनिक टोलीले वीरगञ्ज नगर परिक्रमा गर्नेछ। त्यसपछि टोली घडिअर्वा छठघाट पुगेर निर्धारित सैनिक विधिअनुसार सलामी अर्पण गर्ने कार्यक्रम रहेको छ।
घडिअर्वा छठघाट परिसरमा रहेको सूर्य भगवानको मन्दिरमा पुगेर नेपाली सेनाको टोलीले विशेष सैनिक सम्मानसहित छठी माई तथा सूर्य भगवानलाई सलामी दिने प्रमुख सेनानी कार्कीले जानकारी दिएका छन्।
उनका अनुसार घडिअर्वा छठ पूजा व्यवस्थापन समितिको आग्रहमा नेपाली सेनाले यस वर्ष पनि उक्त कार्यक्रम आयोजना गर्न लागेको हो। छठ पर्वप्रति सर्वसाधारणको आस्था, विश्वास र सहभागिता वर्षेनी बढ्दै गएको उल्लेख गर्दै उनले नेपाली सेनाले मुलुकमा रहेका सबै धर्म, संस्कृति, परम्परा र समुदायको सम्मान गर्दै आएको बताए। धार्मिक तथा सांस्कृतिक विविधताबीच राष्ट्रिय एकता र आपसी सद्भाव कायम राख्नु सबैको साझा दायित्व भएको उनको भनाइ छ।
गत वर्षदेखि सुरु भएको नयाँ परम्परा
घडिअर्वा छठ पूजा व्यवस्थापन समितिका अध्यक्ष राकेश कुमार साहका अनुसार वीरगञ्जमा छठी माई तथा सूर्य भगवानलाई नेपाली सेनाले विशेष सैनिक सलामी अर्पण गर्ने परम्परा गत वर्षदेखि सुरु भएको हो। छठ पर्वको इतिहासमा वीरगञ्जमा यस किसिमको सैनिक सम्मान सम्भवतः पहिलो पटक गत वर्ष प्रदान गरिएको उनले बताए।
उनका अनुसार गत वर्ष स्थानीयवासी तथा छठ पूजा व्यवस्थापन समितिबीच छलफल भएपछि छठ पर्वको अवसरमा नेपाली सेनाबाट विशेष सलामी अर्पण गराउने अवधारणा अघि सारिएको थियो। सोहीअनुसार नेपाली सेनासमक्ष औपचारिक आग्रह गरिएको र सेनाले पनि सकारात्मक प्रतिक्रिया दिँदै सहमति जनाएपछि पहिलो पटक उक्त कार्यक्रम आयोजना गरिएको थियो।
गत वर्षको कार्यक्रमले धार्मिक आस्थासँगै सामाजिक सद्भाव र सांस्कृतिक सम्मानको सन्देश दिएको उल्लेख गर्दै अध्यक्ष साहले यस वर्ष पनि नेपाली सेनाले उक्त कार्यक्रमलाई निरन्तरता दिन लागेकोमा खुसी व्यक्त गरे।
धार्मिक आस्था र राष्ट्रिय सम्मानको संगम
छठ पर्व सूर्य उपासना र प्रकृतिप्रतिको कृतज्ञता प्रकट गर्ने नेपालको प्रमुख धार्मिक तथा सांस्कृतिक पर्वमध्ये एक हो। यस पर्वमा व्रतालुहरूले अस्ताउँदो र उदाउँदो सूर्यलाई अर्घ्य अर्पण गर्दै परिवारको सुख, शान्ति, समृद्धि, सुस्वास्थ्य तथा सन्तानको कल्याणको कामना गर्ने धार्मिक परम्परा रहिआएको छ।
विशेषगरी मधेस प्रदेशमा छठ पर्वको छुट्टै सांस्कृतिक महत्त्व रहेको छ। नदी, पोखरी, तलाउ तथा जलाशयका किनारमा निर्माण गरिने आकर्षक छठघाट, भक्तिपूर्ण वातावरण, सामूहिक सहभागिता र धार्मिक अनुशासनले यस पर्वलाई थप विशिष्ट बनाउने गरेको छ।
वीरगञ्जको घडिअर्वा पोखरीस्थित छठघाट छठ पर्वका अवसरमा विशेष आकर्षणको केन्द्र बन्ने गरेको छ। यहाँ हजारौँ श्रद्धालु भक्तजनको सहभागितामा छठ पूजा हुँदै आएको छ।
यस वर्ष नेपाली सेनाको वाद्यवादन, सैनिक परेड र विशेष सलामी कार्यक्रमले घडिअर्वा छठघाटको धार्मिक वातावरणलाई थप आकर्षक बनाउने अपेक्षा गरिएको छ।
धार्मिक आस्थाको सम्मान, सांस्कृतिक पहिचानको संरक्षण र सामाजिक एकताको सन्देश दिने यस कार्यक्रमलाई वीरगञ्जवासीले विशेष महत्त्वका साथ लिएका छन्।
नेपाली सेनाको सहभागिताले छठ पर्वप्रति राज्यका सुरक्षा निकायको सम्मान र धार्मिक-सांस्कृतिक विविधताप्रतिको सकारात्मक दृष्टिकोणसमेत प्रतिबिम्बित गर्ने विश्वास गरिएको छ।
